Маңғыстау облысының мәдениет басқармасыМемориалдық музей

С.Қондыбайдың 2000-2004 жылдар аралығында «Алтын орда» газетіне көлемді- көлемді 41 мақаласы жарық көреді. «Алтын орда» газеті арқылы Серікбол өзіне М.Ақдәулет, Т.Әсемқұлов, З.Наурызбаева, М.Әуезов, Т.Әліпбай т.б. пікірлес достар табады. Солардың бірі күйші, жазушы, кинодраматург, мәдениеттанушы Т.Әсемқұлов туралы сөз қозғаймыз.

Т.Әсемқұлов (1955-2014) 1955 жылы 1-тамыз күні Аягөз ауданы, Таңсық теміржол станциясында дүниеге келген. Ол алғашқы және тұрақты серікболтанушы ғалымдардың бірі. С.Қондыбай мен Т.Әсемқұлов Серікбол дүниеден өткенге дейін телефонмен хабарласып, тығыз байланыста болды. Сонымен қатар Серікболға почтамен және апасы Балсұлу арқылы да кітаптар беріп жіберетін. Таласбек Серікболдың еңбектеріне: «Шынына келетін болсақ Серікбол Қондыбайдың ашқан жаңалықтары, сол баяғы мың жылдан астам уақыт бұрын Фараби сияқты кемеңгер бабасы салған көне жолдың бүгінгі жалғасы, таза қазақ мүддесіне бағындырылған отандық ғылымның қайтадан жандануы, жаңғыруы. Серікбол өнернамасының ұлы тағылымы да осында» деген құнды пікір айтып, бағасын беріп кетті.

Т.Әсемқұлов С.Қондыбай шығармашылығына байланысты 2005 жылы Алматы қаласында өткен «Серікбол Қондыбай шығармашылығы және ХХІ ғасырдағы гуманитарлық ғылымдардың жаңа парадигмалары» атты І республикалық ғылыми-теориялық конференцияны ұйымдастырушылардың бірі. 2006 жылы Ақтау қаласында өткен «Серікбол Қондыбай шығармашылығы және ХХІ ғасырдағы гуманитарлық ғылымдардың жаңа парадигмалары» атты ІІ республикалық ғылыми-теориялық конференцияға, 2007 жылы Астана қаласында өткен «С.Қондыбай оқулары: мифология және ұлттану» атты ІІІ республикалық конференцияларына қатысты. С.Қондыбай шығармашылығымен байланыстырып І конференцияда «Отражение эволюции брачных отношений в охотничьих мифах», ІІ конференцияда «Древняя стратегическая игра «Төртікем» и дом из сорока одной комнаты», ІІІ конференияда «Промелькнувший метеор» атты баяндамалар оқыған болатын. Бұл материалдардың мазмұнымен Серікбол Қондыбай толық шығармалар жинағының 16-томынан оқып танысуға болады. Т.Әсемқұлов Серікбол туралы, Серікболдың шығармалары, еңбектері туралы «Серікбол Қондыбай – Фарабилер мен Шоқан үлгісіндегі ғалым» («Алтын Орда» газеті 16.06.2006), «Серікболға ұшан теңіз мол ақпарат аспаннан түсті дегенге сенбеймін...» («Алтын Орда» газеті 27.11.2007), «Мифологический образ змеи и дракона драма человеческий предистории» (Рух-Мирас альманахы №2-3(9) 2006) атты басқа да мақалалары жарық көрді. Т.Әсемқұловтың өмір тарихынан озуына байланысты бұдан кейінгі республикалық, халықаралық конференцияларға қатысуды оған тағдыр жазбады.